ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠠᠶᠠᠯᠠᠯ ᠵᠢᠭᠤᠯᠴᠢᠯᠠᠯ
ᠠᠩᠭ᠍ᠯᠢ ᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠤᠨ ᠡᠬᠦᠰᠦᠯ ᠬᠦᠭᠵᠢᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2018/9/18
     ᠠᠩᠭ᠍ᠯᠢ ᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠢ ᠠᠯᠢ ᠡᠷᠳᠡ 16 ᠳ᠋ᠤᠭᠠᠷ ᠵᠠᠭᠤᠨ ᠤ ᠰᠡᠬᠦᠯᠴᠢ᠂ ᠶᠤᠸᠠᠨ ᠤᠯᠤᠰ ᠤᠨ ᠦᠶ᠎ᠡ ᠶᠢᠨ ᠡᠸᠦ᠋ᠷᠦᠫᠠ ᠶᠢᠨ ᠱᠠᠰᠢᠨ ᠳᠡᠯᠭᠡᠷᠡᠬᠦᠯᠦᠭᠴᠢ ᠪᠤᠯᠤᠨ ᠵᠢᠭᠤᠯᠴᠢᠯᠠᠭᠴᠢᠳ   ᠤᠨ  ᠪᠠᠷᠳᠠᠭ᠎ᠠ  ᠰᠢᠨᠵᠢᠯᠡᠬᠦ  ᠠᠵᠢᠯᠯᠠᠭᠠᠨ   ᠠᠴᠠ ᠡᠬᠢᠯᠡᠯ᠎ᠡ ᠭᠡᠵᠦ ᠦᠵᠡᠵᠦ ᠪᠤᠯᠤᠨ᠎ᠠ᠃ ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠡᠸᠦ᠋ᠷᠦᠫᠠ ᠶᠢᠨ ᠵᠢᠭᠤᠯᠴᠢᠯᠠᠭᠴᠢᠳ   ᠤᠨ  ᠵᠢᠭᠤᠯᠴᠢᠯᠠᠯ   ᠤᠨ ᠳᠡᠮᠳᠡᠭᠯᠡᠯ ᠨᠢ ᠡᠷᠳᠡᠮᠳᠡᠳ ᠤᠨ ᠠᠩᠬᠠᠷᠤᠯ ᠢ ᠶᠡᠭᠡ ᠪᠠᠷ ᠳᠠᠳᠠᠭᠰᠠᠨ ᠪᠠᠶᠢᠯ᠎ᠠ᠃ ᠠᠩᠭ᠍ᠯᠢ ᠶᠢᠨ ᠳᠡᠦᠭᠡᠴᠢᠨ  ᠷ᠊  ·  ᠡᠾᠠᠺᠯᠦ᠋ᠲ ︵R.Hakluyt᠂ 1583— 1616︶ ᠤᠨ ︽ᠠᠩᠭ᠍ᠯᠢ ᠬᠡᠯᠡᠳᠦ  ᠦᠨᠳᠦᠰᠦᠳᠡᠨ   ᠤ  ᠭᠤᠤᠯ  ᠭᠤᠤᠯ  ᠳᠠᠯᠠᠢ  ᠪᠠ ᠬᠠᠭᠤᠷᠠᠢ ᠶᠢᠨ ᠠᠶᠠᠯᠠᠯ ᠪᠤᠯᠤᠨ ᠢᠯᠡᠷᠡᠬᠦᠯᠦᠯᠳᠡ︾ ︵1598— 1600 ᠤᠨ ᠤ ᠬᠢᠨᠠᠨ ᠵᠠᠰᠠᠭᠰᠠᠨ ᠢᠶᠠᠷ᠂1625 ᠤᠨ ᠤ Purchas ᠤᠪᠤᠭᠳᠠᠨ ᠤ ᠨᠡᠮᠡᠯᠳᠡ ᠪᠠᠷ︶  ᠬᠡᠬᠦ  ᠨᠡᠷᠡᠳᠦ  ᠵᠤᠬᠢᠶᠠᠯ   ᠳᠤ  ᠫᠯᠠᠨᠤ᠋  ᠺᠠᠷᠫᠢᠨᠢ᠂  ᠷᠦᠪᠷᠦ᠋ᠺ᠂  ᠤᠳᠤᠷᠢᠺ ︵Odoric᠂ 1265— 1331︶ ᠵᠡᠷᠭᠡ ᠬᠦᠮᠦᠰ ᠤᠨ ᠠᠶᠠᠯᠠᠯ ᠤᠨ ᠳᠤᠬᠠᠢ ᠳᠡᠮᠳᠡᠭᠯᠡᠭᠰᠡᠨ ᠪᠠᠶᠢᠳᠠᠭ᠃ ᠳᠤᠰ  ᠨᠤᠮ ᠤᠨ ᠳᠠᠷᠠᠭ᠎ᠠ ᠪᠠᠷ ᠬᠡᠪᠯᠡᠭᠳᠡᠭᠰᠡᠨ  ᠪᠧᠷᠭᠧᠷᠤᠨ  ︵Bergeron᠂1634︶   ᠤ  ᠹᠷᠠᠨᠼᠢ  ᠤᠷᠴᠢᠭᠤᠯᠭ᠎ᠠ᠂  ᠫᠢᠸ᠋ᠲ᠋ᠧᠷᠸᠠᠨ ︵Pietervan der Aa᠂1706︶ ᠤ ᠭᠧᠷᠮᠠᠨ ᠤᠷᠴᠢᠭᠤᠯᠭ᠎ᠠ ᠪᠤᠯᠤᠨ ᠦᠭᠡᠷ᠎ᠡ ᠪᠤᠰᠤᠳ ᠠᠩᠭ᠍ᠯᠢ ᠹᠷᠠᠨᠼᠢ᠂ ᠭᠧᠷᠮᠠᠨ ᠬᠡᠯᠡᠨ ᠤ ᠤᠷᠴᠢᠭᠤᠯᠭ᠎ᠠ ᠶᠢᠨ ᠳᠡᠪᠳᠡᠷ ᠨᠢ ᠴᠦᠮ ᠡᠾᠠᠺᠯᠦ᠋ᠲ ᠤᠨ ᠨᠤᠮ ᠤᠨ ᠠᠩᠭ᠍ᠯᠢ  ᠤᠷᠴᠢᠭᠤᠯᠭ᠎ᠠ  ᠪᠤᠯᠤᠨ  ᠤᠤᠯ  ᠡᠬᠡ ᠨᠤᠤᠷᠠᠭ ᠳᠡᠭᠡᠷ᠎ᠡ ᠰᠠᠭᠤᠷᠢᠯᠠᠭᠰᠠᠨ ᠪᠠᠶᠢᠳᠠᠭ᠃ ᠴᠠᠭᠠᠳᠠᠢ ᠦᠰᠦᠭ ᠢᠶᠠᠷ ᠪᠢᠴᠢᠭᠳᠡᠭᠰᠡᠨ  ᠠᠪᠦ᠋  ᠠᠯ  —  ᠭᠾᠠᠽᠢ  ᠪᠠᠾᠠᠳᠤᠷ ︵Abual—Ghazi Bahadur︶ ᠤᠨ ︽ᠲᠦᠷᠺ  ᠤᠨ ᠤᠭ ᠢᠵᠠᠭᠤᠷ︾ ᠬᠡᠬᠦ ᠨᠤᠮ ﹇ᠡᠨᠡ ᠨᠤᠮ ᠢ ᠦᠫᠠᠢ   ᠶᠢᠨ ᠴᠡᠳᠡᠨᠳᠤᠷᠵᠢ ᠬᠠᠰᠠᠭ ᠬᠡᠯᠡᠨ ᠠᠴᠠ ᠮᠤᠩᠭᠤᠯ ᠪᠢᠴᠢᠭ   ᠲᠤ  ᠤᠷᠴᠢᠭᠤᠯᠵᠦ᠂  1999  ᠤᠨ   ᠳᠤ  ︽ᠰᠡᠴᠡᠯᠡᠭᠴᠢᠳ   ᠤᠨ ᠴᠢᠭᠤᠯᠭᠠᠨ ᠤ ᠨᠠᠮᠠᠭ᠎ᠠ — ᠮᠤᠩᠭᠤᠯ ᠬᠠᠭᠠᠳ ᠤᠨ ᠲᠦᠷᠦ ᠶᠢᠨ ᠳᠤᠪᠴᠢᠶᠠᠨ︾ ᠨᠡᠷ᠎ᠡ ᠪᠠᠷ ᠦᠪᠦᠷ ᠮᠤᠩᠭᠤᠯ   ᠤᠨ  ᠰᠤᠶᠤᠯ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶᠠᠨ ᠠᠴᠠ ᠬᠡᠪᠯᠡᠬᠦᠯᠵᠡᠢ᠃ ᠠᠪᠦ᠋ ᠠᠯ —  ᠭᠾᠠᠽᠢ  ᠪᠠᠾᠠᠳᠤᠷ  =  ᠠᠪᠠᠯᠭᠠᠽᠢ  ᠪᠠᠭᠠᠳᠤᠷ᠃  — ᠨᠠᠶᠢᠷᠠᠭᠤᠯᠤᠭᠴᠢ﹈ 1780 ᠤᠨ ᠳᠤ ᠠᠩᠭ᠍ᠯᠢ ᠬᠡᠯᠡᠨ ᠳᠤ ᠤᠷᠴᠢᠭᠤᠯᠤᠭᠳᠠᠵᠠᠢ᠃ ᠳᠤᠰ ᠨᠤᠮ ᠳᠤ ᠤᠷᠤᠭᠰᠠᠨ ᠮᠤᠩᠭᠤᠯ ᠤᠨ ᠡᠷᠳᠡᠨ ᠤ ᠳᠡᠦᠭᠡ ᠶᠢᠨ ᠳᠤᠬᠠᠢ ᠳᠡᠮᠳᠡᠭᠯᠡᠯ ᠳᠤ ᠳᠤᠮᠤᠭ ᠦᠯᠢᠭᠡᠷ ᠤᠨ ᠵᠤᠶᠢᠯ ᠤᠯᠠᠨ ᠪᠠᠶᠢᠭᠰᠠᠨ ᠪᠤᠯᠬᠤᠷ ᠳᠡᠦᠭᠡᠨ ᠮᠠᠲ᠋ᠧᠷᠢᠶᠠᠯ ᠤᠨ  ᠦᠨ᠎ᠡ  ᠦᠷᠳᠡᠭ   ᠢᠶᠠᠷ  ᠳᠡᠶᠢᠮᠦ  ᠶᠡᠭᠡ  ᠪᠢᠰᠢ  ᠪᠢᠯᠡ᠃  ᠬᠡᠪᠡᠴᠦ  ᠬᠠᠮᠤᠭ   ᠠᠴᠠ  ᠡᠷᠳᠡ  ᠠᠩᠭ᠍ᠯᠢ  ᠬᠡᠯᠡᠨ   ᠳᠤ ᠤᠷᠴᠢᠭᠤᠯᠤᠭᠳᠠᠭᠰᠠᠨ ᠮᠤᠩᠭᠤᠯ ᠳᠡᠦᠭᠡ ᠶᠢᠨ ᠳᠤᠬᠠᠢ ᠰᠤᠷᠪᠤᠯᠵᠢ ᠪᠤᠯᠬᠤᠷ ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠮᠠᠰᠢ ᠴᠢᠬᠤᠯᠠᠴᠢᠯᠠᠭᠳᠠᠵᠦ ᠪᠠᠶᠢᠵᠠᠢ᠃               17 ᠳ᠋ᠤᠭᠠᠷ ᠵᠠᠭᠤᠨ ᠤ ᠡᠬᠢᠨ ᠪᠤᠯ ᠡᠸᠦ᠋ᠷᠦᠫᠠ ᠶᠢᠨ ᠳᠤᠷᠤᠨᠠᠳᠠᠬᠢᠨ ᠤ ᠰᠤᠳᠤᠯᠤᠯ ᠤᠨ ᠡᠬᠢᠯᠡᠨ ᠮᠠᠨᠳᠤᠭᠰᠠᠨ  ᠴᠠᠭ ᠦᠶ᠎ᠡ ᠪᠤᠯᠤᠨ᠎ᠠ᠃ ᠳᠤᠬᠠᠢ ᠶᠢᠨ ᠦᠶ᠎ᠡ ᠳᠤ᠂ ᠹᠷᠠᠨᠼᠢ᠂ ᠠᠩᠭ᠍ᠯᠢ᠂ ᠢᠲ᠋ᠠᠯᠢ᠂  ᠭᠧᠷᠮᠠᠨ᠂  ᠬᠤᠯᠠᠨᠳ᠋  ᠵᠡᠷᠭᠡ  ᠤᠯᠤᠰ  ᠴᠦᠮ ᠦᠪᠡᠷ ᠦᠪᠡᠷ ᠤᠨ ᠢᠶᠠᠨ ᠨᠡᠯᠢᠶᠠᠳ ᠬᠡᠮᠵᠢᠶᠡᠨ ᠤ ᠳᠤᠷᠤᠨᠠᠳᠠᠬᠢᠨ ᠤ ᠰᠤᠷᠪᠤᠯᠵᠢ ᠪᠢᠴᠢᠭ  ᠲᠠᠢ ᠪᠤᠯᠵᠦ᠂ ᠵᠠᠷᠢᠮ  ᠨᠡᠷᠡᠳᠦ  ᠶᠡᠭᠡ ᠰᠤᠷᠭᠠᠭᠤᠯᠢ ᠨᠤᠭᠤᠳ ᠤᠷᠢᠳ ᠬᠤᠵᠢᠳ ᠠᠷᠠᠪ ᠬᠡᠯᠡ᠂ ᠫᠧᠷᠰ ᠬᠡᠯᠡ᠂ ᠬᠢᠳᠡᠳ ᠬᠡᠯᠡ᠂  ᠮᠤᠩᠭᠤᠯ  ᠬᠡᠯᠡ᠂  ᠲᠦᠷᠺ  ᠬᠡᠯᠡ ᠵᠡᠷᠭᠡ ᠳᠤᠷᠤᠨᠠᠳᠠᠬᠢᠨ ᠤ ᠬᠡᠯᠡᠨ ᠤ ᠬᠢᠴᠢᠶᠡᠯ ᠬᠦᠮᠦᠵᠢᠯ ᠢ ᠨᠡᠭᠡᠭᠡᠵᠦ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠰᠤᠳᠤᠯᠤᠯ   ᠤᠨ  ᠨᠦᠬᠦᠴᠡᠯ   ᠢ ᠪᠦᠷᠢᠯᠳᠦᠬᠦᠯᠦᠭᠰᠡᠨ ᠢᠶᠠᠷ ᠨᠢᠭᠡ ᠤᠯᠠᠨ ᠳᠤᠷᠤᠨᠠᠳᠠᠬᠢᠨ ᠤ ᠡᠷᠳᠡᠮᠳᠡᠨ ᠪᠤᠯᠤᠨ  ᠮᠤᠩᠭᠤᠯᠴᠢ  ᠡᠷᠳᠡᠮᠳᠡᠨ  ᠢᠯᠡᠷᠡᠨ  ᠭᠠᠷᠤᠭᠰᠠᠨ ᠪᠠᠶᠢᠨ᠎ᠠ᠃ ᠢᠩᠬᠢᠭᠡᠳ ᠨᠢᠭᠡᠨ ᠦᠶ᠎ᠡ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ ᠳᠡᠦᠭᠡᠨ ᠳᠡᠭᠡᠷᠡᠬᠢ  ᠬᠠᠮᠤᠭ   ᠤᠨ  ᠬᠦᠴᠦᠷᠭᠡᠭ  ᠮᠦᠷᠳᠡᠭᠡᠨ ᠡᠸᠦ᠋ᠷᠦᠫᠠ ᠲᠢᠪ ᠲᠤ ᠰᠢᠭᠤᠳ ᠶᠡᠭᠡ ᠨᠦᠯᠦᠭᠡ ᠦᠵᠡᠬᠦᠯᠦᠭᠰᠡᠨ ᠮᠤᠩᠭᠤᠯ ᠬᠦᠮᠦᠨ ᠪᠤᠯᠤᠨ ᠮᠤᠩᠭᠤᠯ ᠬᠠᠭᠠᠨᠳᠤ ᠤᠯᠤᠰ   ᠤᠨ ᠳᠡᠦᠭᠡ ᠨᠢ ᠡᠳᠡᠭᠡᠷ ᠳᠤᠷᠤᠨᠠᠳᠠᠬᠢᠨ ᠤ ᠡᠷᠳᠡᠮᠳᠡᠳ ᠤᠨ ᠠᠩᠬᠠᠷᠤᠯ ᠢ ᠠᠶᠠᠨᠳᠠᠭᠠᠨ ᠳᠠᠳᠠᠭᠰᠠᠨ ᠰᠤᠳᠤᠯᠤᠯ ᠤᠨ ᠴᠠᠷᠠᠭ᠎ᠠ ᠬᠦᠷᠢᠶ᠎ᠡ ᠪᠤᠯᠵᠠᠢ᠃ 17 ᠳ᠋ᠤᠭᠠᠷ ᠵᠠᠭᠤᠨ ᠳᠤ ᠹᠷᠠᠨᠼᠢ ᠳᠤ ᠮᠤᠩᠭᠤᠯ ᠶᠤᠸᠠᠨ ᠤᠯᠤᠰ ᠤᠨ ᠳᠡᠦᠭᠡ ᠶᠢᠨ ᠳᠤᠬᠠᠢ ᠠᠩᠬᠠᠨ   ᠤ  ᠳᠤᠰᠬᠠᠢ ᠪᠦᠳᠦᠭᠡᠯ ᠮᠡᠨᠳᠦᠯᠡᠪᠡ᠃ ᠡᠨᠡ ᠪᠤᠯ ᠳᠠᠷᠤᠢ ᠺᠷᠦᠶᠢᠺᠰ ︵Petis dela  croix᠂  1622  —  1695︶   ᠤᠨ ᠵᠤᠬᠢᠶᠠᠭᠰᠠᠨ ︽ᠡᠷᠳᠡᠨ ᠤ ᠮᠤᠩᠭᠤᠯ ᠪᠤᠯᠤᠨ ᠲᠠᠲ᠋ᠠᠷ ᠬᠦᠮᠦᠨ ᠤ ᠨᠢᠭᠡᠳᠦᠭᠡᠷ  ᠬᠠᠭᠠᠨ  ᠠᠭᠤᠤ  ᠶᠡᠭᠡ  ᠴᠢᠩᠬᠢᠰ  ᠬᠠᠭᠠᠨ   ᠤ ᠳᠡᠦᠭᠡ︾ ᠭᠡᠬᠦ ᠨᠤᠮ ᠪᠤᠯᠤᠨ᠎ᠠ᠃ ᠺᠷᠤᠶᠢᠺᠰ ᠠᠪᠤᠭᠠᠢ ᠫᠧᠷᠰ᠂ ᠠᠷᠠᠪ ᠬᠡᠯᠡᠨ ᠤ ᠳᠡᠦᠭᠡ ᠶᠢᠨ ᠮᠠᠲ᠋ᠧᠷᠢᠶᠠᠯ  ᠪᠤᠯᠤᠨ  ᠡᠸᠦ᠋ᠷᠦᠫᠠ ᠶᠢᠨ ᠵᠢᠭᠤᠯᠴᠢᠳ ᠤᠨ ᠵᠢᠭᠤᠯᠴᠢᠯᠠᠯ ᠤᠨ ᠳᠡᠮᠳᠡᠭᠯᠡᠯ ᠳᠤ ᠦᠨᠳᠦᠰᠦᠯᠡᠵᠦ᠂10 ᠵᠢᠯ ᠤᠨ ᠬᠦᠴᠦ ᠬᠦᠳᠡᠯᠮᠤᠷᠢ ᠶᠢ ᠵᠠᠷᠤᠴᠠᠭᠤᠯᠵᠦ ᠪᠠᠶᠢᠭᠠᠳ ᠳᠤᠰ ᠨᠤᠮ ᠢ ᠤᠷᠴᠢᠭᠤᠯᠤᠨ ᠨᠠᠶᠢᠷᠠᠭᠤᠯᠵᠦ ᠪᠦᠳᠦᠭᠡᠵᠡᠢ᠃ ᠳᠤᠰ ᠨᠤᠮ ᠨᠡᠶᠢᠳᠡ4 ᠪᠤᠳᠢ ᠲᠠᠢ᠃ ᠴᠢᠩᠬᠢᠰ ᠬᠠᠭᠠᠨ ᠤ ᠨᠠᠮᠳᠠᠷ ᠵᠢᠴᠢ ᠳᠡᠬᠦᠨ ᠤ ᠵᠠᠯᠭᠠᠮᠵᠢᠯᠠᠭᠴᠢᠳ ︵17 ᠳ᠋ᠤᠭᠠᠷ ᠵᠠᠭᠤᠨ ᠪᠤᠯᠳᠠᠯᠠᠬᠢ︶ ᠤᠨ ᠳᠦᠬᠦᠮ ᠨᠠᠮᠳᠠᠷ᠂ ᠡᠷᠳᠡᠨ ᠤ ᠮᠤᠩᠭᠤᠯ  ᠤᠨ ᠵᠠᠩ ᠳᠠᠳᠬᠠᠯ᠂ ᠬᠠᠤᠯᠢ ᠴᠠᠭᠠᠵᠠ ᠠᠴᠠ ᠭᠠᠳᠠᠨ᠎ᠠ ᠮᠤᠩᠭᠤᠯ᠂ ᠲᠦᠷᠺ᠂ ᠬᠢᠪᠴᠠᠭ᠂ ᠤᠶᠢᠭᠤᠷ ᠪᠤᠯᠤᠨ  ᠦᠷᠦᠨᠡᠳᠦ   ᠶᠢᠨ ᠲᠠᠲ᠋ᠠᠷᠴᠤᠳ ᠤᠨ ᠭᠠᠵᠠᠷ ᠵᠦᠢ ᠵᠡᠷᠭᠡ ᠠᠭᠤᠯᠭ᠎ᠠ ᠶᠢ ᠬᠠᠮᠤᠷᠤᠭᠰᠠᠨ ᠪᠠᠶᠢᠳᠠᠭ᠃ ᠨᠤᠮ   ᠤᠨ  ᠡᠴᠦᠰ   ᠲᠤ  ᠡᠸᠦ᠋ᠷᠦᠫᠠ   ᠶᠢᠨ ᠵᠢᠭᠤᠯᠴᠢᠳ ᠤᠨ ᠵᠤᠬᠢᠶᠠᠭᠰᠠᠨ ᠨᠤᠮ ᠤᠨ ᠨᠡᠷᠡᠰ ᠪᠤᠯᠤᠨ  ᠳᠡᠳᠡ  ᠨᠠᠷ   ᠤᠨ  ᠨᠠᠮᠳᠠᠷ   ᠢ  ᠳᠠᠭᠠᠯᠳᠤᠭᠤᠯᠵᠠᠢ᠃  ᠳᠤᠰ  ᠨᠤᠮ ᠵᠤᠬᠢᠶᠠᠭᠴᠢ ᠶᠢ ᠨᠠᠰᠤ ᠪᠠᠷᠠᠭᠰᠠᠨ ᠤ ᠳᠠᠷᠠᠭᠠᠬᠢ15 ᠵᠢᠯ ᠳᠠᠬᠢ ᠵᠢᠯ᠂ ᠦᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ1710 ᠤᠨ   ᠳᠤ  ᠫᠡᠷᠢᠰ   ᠲᠤ ᠬᠡᠪᠯᠡᠭᠳᠡᠵᠦ᠂1722 ᠤᠨ ᠳᠤ ᠯᠤᠨᠳᠤᠨ ᠳᠤ ᠠᠩᠭ᠍ᠯᠢ  ᠬᠡᠯᠡ  ᠳᠡᠭᠡᠷ᠎ᠡ  ᠤᠷᠴᠢᠭᠤᠯᠤᠭᠳᠠᠨ  ᠬᠡᠪᠯᠡᠭᠳᠡᠵᠡᠢ᠃  ᠡᠬᠦᠨ   ᠠᠴᠠ ᠬᠤᠶᠢᠰᠢ ᠳᠡᠨᠳᠡᠬᠢ ᠶᠢᠨ ᠬᠦᠮᠦᠰ ᠳᠤᠷᠤᠨᠠᠳᠤ  ᠳᠤ ᠮᠤᠩᠭᠤᠯ ᠬᠡᠬᠦ ᠨᠢᠭᠡᠨ ᠠᠭᠤᠤ ᠶᠡᠭᠡ  ᠦᠨᠳᠦᠰᠦᠳᠡᠨ  ᠪᠠᠶᠢᠬᠤ   ᠶᠢ  ᠡᠬᠢᠯᠡᠨ ᠤᠶᠢᠯᠠᠭᠠᠵᠦ᠂ ᠮᠤᠩᠭᠤᠯ ᠬᠦᠮᠦᠨ  ᠳᠤ ᠶᠡᠬᠡᠳᠡ ᠰᠤᠨᠢᠷᠬᠠᠯᠳᠠᠢ ᠪᠤᠯᠤᠭᠰᠠᠨ ᠪᠠᠶᠢᠯ᠎ᠠ᠃               19 ᠳ᠋ᠤᠭᠡᠷ ᠵᠠᠭᠤᠨ ᠪᠤᠯ ᠠᠩᠭ᠍ᠯᠢ ᠶᠢᠨ ᠳᠤᠷᠤᠨᠠᠳᠠᠬᠢᠨ ᠤ ᠰᠤᠳᠤᠯᠤᠯ  ᠪᠤᠯᠤᠨ  ᠮᠤᠩᠭᠤᠯ  ᠰᠤᠳᠤᠯᠤᠯ  ᠶᠡᠭᠡ   ᠪᠠᠷ ᠬᠦᠭᠵᠢᠭᠰᠡᠨ ᠴᠠᠭ ᠦᠶ᠎ᠡ ᠪᠤᠯᠤᠨ᠎ᠠ᠃ ᠨᠢᠭᠡ ᠳᠠᠯ᠎ᠠ ᠪᠠᠷ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠦᠭᠵᠢᠯᠳᠡ ᠠᠴᠠ  ᠰᠢᠯᠳᠠᠭᠠᠯᠠᠵᠦ᠂  ᠬᠡᠯᠡ ᠰᠢᠨᠵᠢᠯᠡᠯ᠂ ᠳᠡᠦᠭᠡ ᠶᠢᠨ ᠤᠬᠠᠭᠠᠨ᠂ ᠬᠦᠮᠦᠨ ᠵᠦᠢ ᠶᠢᠨ ᠤᠬᠠᠭᠠᠨ ᠴᠦᠮ ᠰᠢᠨ᠎ᠡ ᠰᠤᠳᠤᠯᠤᠯ   ᠤᠨ  ᠠᠷᠭ᠎ᠠ  ᠪᠠᠷᠢᠯ  ᠪᠤᠯᠤᠨ ᠮᠡᠷᠭᠡᠵᠢᠯ ᠤᠨ ᠰᠢᠰᠲ᠋ᠧᠮ ᠲᠠᠢ ᠪᠤᠯᠵᠦ᠂ ᠤᠨᠴᠠᠭᠠᠶᠢᠯᠠᠨ ᠬᠠᠷᠢᠴᠠᠭᠤᠯᠤᠭᠰᠠᠨ ᠬᠡᠯᠡ ᠰᠢᠨᠵᠢᠯᠡᠯ ᠨᠢ ᠳᠤᠷᠤᠨᠠᠳᠠᠬᠢᠨ ᠤ  ᠰᠤᠳᠤᠯᠤᠯ ᠤᠨ ᠬᠦᠭᠵᠢᠯᠳᠡ ᠳᠤ ᠬᠠᠮᠤᠭ ᠤᠨ ᠶᠡᠭᠡ ᠳᠦᠯᠬᠢᠬᠦ ᠬᠦᠴᠦᠨ ᠪᠤᠯᠵᠠᠢ᠃ ᠨᠦᠬᠦᠭᠡ ᠳᠠᠯ᠎ᠠ ᠪᠠᠷ᠂ ᠠᠩᠭ᠍ᠯᠢ ᠵᠡᠷᠭᠡ ᠡᠸᠦ᠋ᠷᠦᠫᠠ ᠶᠢᠨ ᠬᠦᠴᠦᠷᠭᠡᠭ ᠬᠦᠷᠦᠨ ᠨᠦᠭᠦᠳ ᠤᠨ ᠺᠤᠯᠤᠨᠢᠴᠢᠯᠠᠨ ᠦᠷᠭᠡᠳᠬᠡᠬᠦ ᠲᠦᠷᠦ ᠶᠢᠨ ᠪᠤᠳᠤᠯᠭ᠎ᠠ ᠨᠢ ᠠᠩᠭ᠍ᠯᠢ   ᠶᠢᠨ  ᠳᠤᠷᠤᠨᠠᠳᠠᠬᠢᠨ   ᠤ ᠳᠡᠦᠭᠡ ᠰᠤᠶᠤᠯ ᠤᠨ ᠰᠤᠳᠤᠯᠤᠯ ᠢ ᠳᠦᠯᠬᠢᠨ ᠠᠬᠢᠭᠤᠯᠤᠭᠰᠠᠨ ᠢᠶᠠᠷ ᠪᠠᠷᠠᠬᠤ  ᠦᠭᠡᠢ  ᠪᠠᠰᠠ  ᠳᠤᠷᠤᠨᠠᠳᠠᠬᠢᠨ   ᠤ  ᠰᠤᠷᠪᠤᠯᠵᠢ ᠪᠢᠴᠢᠭ ᠪᠤᠯᠤᠨ ᠪᠤᠳᠠᠳᠤ ᠪᠤᠳᠠᠰ ᠤᠨ ᠮᠠᠲ᠋ᠧᠷᠢᠶᠠᠯ ᠢ ᠠᠮᠠᠷᠬᠠᠨ ᠤᠯᠵᠦ ᠴᠢᠳᠠᠬᠤ  ᠪᠤᠯᠭᠠᠭᠰᠠᠨ  ᠪᠠᠶᠢᠨ᠎ᠠ᠃  ᠳᠤᠷᠤᠨᠠᠳᠠᠬᠢᠨ   ᠤ ᠰᠤᠳᠤᠯᠤᠯ ᠤᠨ ᠬᠡᠳᠦᠨ ᠰᠠᠯᠪᠤᠷᠢ ᠰᠤᠳᠤᠯᠤᠯ ᠤᠨ ᠨᠢᠭᠡᠨ ᠪᠤᠯᠬᠤ ᠮᠤᠩᠭᠤᠯ ᠰᠤᠳᠤᠯᠤᠯ ᠨᠢ ᠪᠠᠰᠠ ᠡᠬᠦᠨ ᠤ ᠳᠠᠭᠠᠤ  ᠢᠯᠡᠳᠳᠡ ᠬᠦᠭᠵᠢᠯᠳᠡ ᠲᠠᠢ ᠪᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃ ᠤᠨᠴᠠᠭᠠᠶᠢᠯᠠᠨ20 ᠳ᠋ᠤᠭᠠᠷ ᠵᠠᠭᠤᠨ ᠤ ᠡᠬᠢᠨ ᠳᠤ᠂ ᠠᠮᠧᠷᠢᠺᠠ  ᠶᠢᠨ ᠨᠡᠷᠡᠳᠦ  ᠬᠤᠶᠠᠷ ᠮᠤᠩᠭᠤᠯᠴᠢ ᠡᠷᠳᠡᠮᠳᠡᠨ ᠯᠠᠲᠲ᠋ᠢᠮᠤᠷᠧ᠂ ᠦᠨᠡᠨ ᠨᠠᠷ ᠠᠩᠭ᠍ᠯᠢ ᠳᠤ ᠤᠴᠢᠵᠦ ᠨᠤᠳᠤᠭᠰᠢᠭᠰᠠᠨ  ᠤ ᠳᠠᠷᠠᠭ᠎ᠠ ᠠᠩᠭ᠍ᠯᠢ ᠶᠢᠨ ᠮᠤᠩᠭᠤᠯ ᠤᠨ ᠰᠤᠳᠤᠯᠤᠯ ᠳᠠᠬᠢᠨ ᠰᠡᠷᠬᠦᠨ ᠬᠦᠭᠵᠢᠬᠦ ᠳᠤᠬᠢᠶᠠᠯ ᠢ ᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃               20 ᠳ᠋ᠤᠭᠠᠷ ᠵᠠᠭᠤᠨ ᠤ ᠰᠡᠬᠦᠯᠴᠢ ᠪᠤᠯᠬᠤ ᠳᠤ ᠠᠩᠭ᠍ᠯᠢ ᠳᠤ ᠤᠯᠠᠨ ᠠᠷᠪᠢᠨ  ᠮᠤᠩᠭᠤᠯᠴᠢ  ᠡᠷᠳᠡᠮᠳᠡᠨ  ᠴᠤᠯᠭᠤᠷᠠᠨ ᠭᠠᠷᠴᠦ᠂ ᠯᠤᠨᠳᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ᠂  ᠺᠠᠮᠪᠷᠢᠵ  ᠶᠡᠭᠡ  ᠰᠤᠷᠭᠠᠭᠤᠯᠢ᠂  ᠯᠢᠢᠳᠡᠰ  ᠶᠡᠭᠡ  ᠰᠤᠷᠭᠠᠭᠤᠯᠢ  ᠵᠡᠷᠭᠡ  ᠮᠤᠩᠭᠤᠯ ᠰᠤᠳᠤᠯᠤᠯ ᠤᠨ ᠲᠦᠪ ᠨᠦᠭᠦᠳ ᠪᠤᠢ ᠪᠤᠯᠵᠦ᠂ ᠤᠯᠠᠨ ᠠᠷᠪᠢᠨ ᠰᠤᠳᠤᠯᠭᠠᠨ ᠤ ᠦᠷ᠎ᠡ ᠪᠦᠳᠦᠭᠡᠯ  ᠬᠡᠪᠯᠡᠭᠳᠡᠨ  ᠨᠡᠶᠢᠳᠡᠯᠡᠭᠳᠡᠵᠦ ᠪᠠᠶᠢᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠠᠩᠭ᠍ᠯᠢ ᠶᠢᠨ ᠮᠤᠩᠭᠤᠯ  ᠰᠤᠳᠤᠯᠤᠯ   ᠤᠨ  ᠨᠡᠶᠢᠭᠡᠮᠯᠢᠭ  ᠪᠠᠶᠢᠭᠤᠯᠤᠭᠳᠠᠵᠦ᠂  ᠠᠩᠭ᠍ᠯᠢ   ᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠢ ᠳᠦᠯᠦᠪᠯᠡᠭᠡ ᠲᠠᠢ᠂ ᠵᠤᠬᠢᠶᠠᠨ ᠪᠠᠶᠢᠭᠤᠯᠤᠯᠳᠠ ᠲᠠᠢ ᠪᠠᠷ ᠤᠳᠤᠷᠢᠳᠤᠨ ᠬᠢᠵᠦ᠂ ᠠᠩᠭ᠍ᠯᠢ ᠶᠢᠨ  ᠮᠤᠩᠭᠤᠯ ᠰᠤᠳᠤᠯᠤᠯ ᠤᠨ ᠦᠢᠯᠡᠰ ᠢ ᠤᠯᠠᠮ ᠴᠢᠨᠠᠭᠰᠢᠳᠠ ᠲᠦᠯᠬᠢᠨ ᠠᠬᠢᠭᠤᠯᠵᠠᠢ᠃ ᠳᠡᠯᠡᠭᠡᠢ ᠶᠢᠨ ᠬᠤᠶᠠᠳᠤᠭᠠᠷ ᠳᠠᠶᠢᠨ   ᠤ  ᠳᠠᠷᠠᠭ᠎ᠠ᠂ ᠦᠷᠦᠨᠡᠳᠡᠬᠢᠨ ᠤ ᠮᠤᠩᠭᠤᠯ ᠰᠤᠳᠤᠯᠤᠯ ᠭᠤᠤᠯᠳᠠᠭᠤ ᠤᠤᠯ ᠤᠨ ᠪᠠᠷᠠᠭᠤᠨ ᠭᠧᠷᠮᠠᠨ᠂ ᠠᠩᠭ᠍ᠯᠢ ᠪᠤᠯᠤᠨ ᠹᠷᠠᠨᠼᠢ  ᠵᠡᠷᠭᠡ  ᠤᠯᠤᠰ ᠲᠤ ᠰᠡᠷᠬᠦᠨ ᠬᠦᠭᠵᠢᠪᠡ᠃ ᠡᠳᠡᠭᠡᠷ ᠤᠯᠤᠰ ᠤᠷᠢᠳ ᠬᠤᠵᠢᠳ ᠨᠡᠯᠢᠶᠡᠳ ᠤᠯᠠᠨ ᠮᠤᠩᠭᠤᠯ  ᠰᠤᠳᠤᠯᠤᠯ   ᠤᠨ  ᠳᠦᠪ  ᠪᠤᠶᠤ ᠰᠤᠳᠤᠯᠭᠠᠨ ᠤ ᠪᠠᠶᠢᠭᠤᠯᠤᠮᠵᠢ ᠶᠢ ᠪᠠᠶᠢᠭᠤᠯᠵᠦ᠂ ᠡᠬᠦᠨ ᠤᠨ ᠳᠤᠳᠤᠷ᠎ᠠ ᠹᠷᠠᠨᠼᠢ ᠳᠡᠷᠢᠬᠦᠯᠡᠵᠦ ᠪᠠᠶᠢᠯ᠎ᠠ᠃ 20 ᠳ᠋ᠤᠭᠠᠷ ᠵᠠᠭᠤᠨ ᠤ 90 ᠳ᠋ᠤᠭᠡᠷ ᠤᠨ ᠠᠴᠠ ᠬᠤᠶᠢᠰᠢ ᠠᠩᠭ᠍ᠯᠢ ᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠨᠢ ᠨᠡᠩ ᠶᠡᠭᠡ ᠬᠦᠭᠵᠢᠯᠳᠡ ᠶᠢᠨ ᠡᠷᠴᠢᠮ ᠲᠠᠢ ᠪᠤᠯᠵᠦ᠂ ᠵᠠᠷᠢᠮ ᠳᠠᠯ᠎ᠠ ᠪᠠᠷ ᠦᠷᠦᠨᠡᠳᠡᠬᠢᠨ ᠤ ᠮᠤᠩᠭᠤᠯ ᠰᠤᠳᠤᠯᠤᠯ ᠤᠨ ᠳᠦᠪ ᠪᠤᠯᠵᠦ ᠪᠠᠶᠢᠭᠰᠠᠨ ᠹᠷᠠᠨᠼᠢ   ᠠᠴᠠ  ᠳᠠᠪᠠᠭ᠋ᠤ  ᠪᠤᠯᠵᠠᠢ᠃ ᠠᠩᠭ᠍ᠯᠢ ᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠨᠡᠯᠢᠶᠡᠳ ᠤᠷᠳᠤ ᠬᠤᠭᠤᠴᠠᠭᠠᠨ ᠤ ᠳᠡᠦᠭᠡ ᠪᠤᠯᠤᠨ ᠤᠯᠠᠮᠵᠢᠯᠠᠯ ᠲᠠᠢ  ᠪᠠᠶᠢᠵᠦ᠂  ᠮᠤᠩᠭᠤᠯ ᠰᠤᠳᠤᠯᠤᠤᠯ ᠤᠨ ᠳᠦᠪ ᠨᠦᠭᠦᠳ ᠨᠢ ᠭᠤᠤᠯᠳᠠᠭᠤ ᠯᠤᠨᠳᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ᠂ ᠺᠠᠮᠪᠷᠢᠵ ᠶᠡᠭᠡ ᠰᠤᠷᠭᠠᠭᠤᠯᠢ᠂ ᠯᠢᠢᠳᠡᠰ ᠶᠡᠭᠡ ᠰᠤᠷᠭᠠᠭᠤᠯᠢ ᠳᠤ ᠪᠠᠶᠢᠭᠤᠯᠤᠭᠳᠠᠵᠦ᠂ ᠳᠤᠰ ᠳᠤᠰ ᠤᠨ ᠳᠤᠰᠬᠠᠢ ᠮᠡᠷᠭᠡᠵᠢᠯ ᠤᠨ ᠤᠨᠴᠠᠯᠢᠭ ᠪᠤᠯᠤᠨ ᠰᠤᠳᠤᠯᠤᠯ ᠤᠨ ᠴᠢᠭᠯᠡᠯ ᠲᠠᠢ ᠪᠠᠶᠢᠵᠦ᠂ ᠬᠦᠭᠵᠢᠯᠳᠡ ᠶᠢᠨ ᠵᠠᠮ ᠨᠢ ᠭᠡᠰᠡᠭ ᠲᠡᠭᠡᠨ ᠬᠦᠭᠵᠢᠩᠬᠦᠢ᠂ ᠬᠡᠰᠡᠭ ᠲᠡᠭᠡᠨ  ᠪᠠᠭᠤᠷᠠᠩᠭᠤᠢ  ᠤᠨᠴᠠᠯᠢᠭ   ᠲᠠᠢ  ᠪᠠᠶᠢᠵᠦ ᠪᠠᠶᠢᠨ᠎ᠠ᠃ ᠳᠤᠬᠠᠶᠢᠯᠠᠪᠠᠯ᠂ ᠯᠤᠨᠳᠤᠨ ᠶᠡᠭᠡ  ᠰᠤᠷᠭᠠᠭᠤᠯᠢ   ᠶᠢᠨ  ᠳᠤᠮᠳᠠᠳᠤ  ᠤᠯᠤᠰ  ᠪᠤᠯᠤᠨ  ᠳᠤᠳᠤᠭᠠᠳᠤ  ᠠᠽᠢᠶ᠎ᠠ   ᠶᠢᠨ ᠰᠤᠳᠤᠯᠭᠠᠨ ᠤ ᠰᠠᠯᠪᠤᠷᠢ ᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠨᠢ ᠨᠢᠭᠡᠨ ᠦᠶ᠎ᠡ ᠠᠩᠭ᠍ᠯᠢ ᠳᠤ ᠳᠡᠷᠢᠬᠦᠯᠡᠵᠦ  ᠪᠠᠶᠢᠭᠰᠠᠨ  ᠶᠤᠮ᠃  ᠳᠡᠷᠡ ᠦᠶ᠎ᠡ ᠨᠢ ᠠᠩᠭ᠍ᠯᠢ ᠶᠢᠨ ᠨᠡᠷᠡᠳᠦ ᠮᠤᠩᠭᠤᠯᠴᠢ ᠡᠷᠳᠡᠮᠳᠡᠨ ᠴᠡᠷᠯᠢᠰ ᠪᠠᠦᠳ᠋ᠸᠠ ᠤ ᠳᠤᠰ ᠰᠤᠷᠭᠠᠭᠤᠯᠢ ᠳᠤ ᠠᠵᠢᠯᠯᠠᠵᠦ  ᠪᠠᠶᠢᠭᠰᠠᠨ ᠦᠶ᠎ᠡ ︵1955 — 1984︶ ᠪᠢᠯᠡ᠃ ᠳᠡᠷᠡ  ᠪᠠᠷ ᠮᠤᠩᠭᠤᠯ ᠰᠤᠳᠤᠯᠤᠯ ᠤᠨ ᠳᠤᠬᠠᠢ ᠤᠯᠠᠨ ᠳᠠᠯ᠎ᠠ ᠶᠢᠨ ᠰᠢᠨᠵᠢᠯᠡᠭᠡᠨ ᠤ ᠦᠬᠦᠯᠡᠯ ᠵᠤᠬᠢᠶᠠᠯ ᠪᠢᠴᠢᠨ ᠬᠡᠪᠯᠡᠬᠦᠯᠵᠦ ᠪᠠᠶᠢᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠮᠤᠩᠭᠤᠯ  ᠰᠤᠳᠤᠯᠤᠯ   ᠤᠨ  ᠬᠢᠴᠢᠶᠡᠯ  ᠬᠦᠮᠦᠵᠢᠯ ᠨᠡᠭᠡᠭᠡᠵᠦ᠂ ᠵᠾᠤᠨ ᠮᠠᠨ ᠮᠡᠳᠦ  ᠶᠢᠨ ᠤᠯᠠᠨ ᠠᠷᠪᠢᠨ ᠨᠡᠷᠡᠳᠦ ᠡᠷᠳᠡᠮᠳᠡᠨ ᠢ ᠬᠦᠮᠦᠵᠢᠬᠦᠯᠵᠦ ᠪᠠᠶᠢᠵᠠᠢ᠃ ᠬᠡᠪᠡᠴᠦ  ᠳᠡᠷᠡ  ᠠᠵᠢᠯ ᠠᠴᠠ ᠪᠠᠨ ᠠᠮᠠᠷᠠᠭᠰᠠᠨ ᠤ ᠳᠠᠷᠠᠭ᠎ᠠ ᠳᠤᠰ ᠰᠤᠷᠭᠠᠭᠤᠯᠢ ᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠠᠭᠠᠵᠢᠮ ᠢᠶᠠᠷ ᠪᠠᠭᠤᠷᠠᠯᠳᠠ   ᠶᠢᠨ  ᠱᠠᠳᠤᠨ ᠳᠤ ᠤᠷᠤᠵᠦ᠂ ᠤᠳᠤ ᠪᠤᠯᠬᠤ ᠳᠤ ᠰᠤᠷᠤᠭᠴᠢ ᠶᠢᠨ ᠢᠷᠡᠯᠳᠡ ᠦᠭᠡᠢ ᠪᠤᠯᠤᠭᠰᠠᠨ ᠬᠡᠬᠦ ᠮᠡᠳᠦ ᠶᠢᠨ ᠰᠢᠯᠳᠠᠭᠠᠨ ᠢᠶᠠᠷ  ᠮᠤᠩᠭᠤᠯ ᠰᠤᠳᠤᠯᠤᠯ ᠤᠨ ᠬᠢᠴᠢᠶᠡᠯ ᠬᠦᠮᠦᠵᠢᠯ ᠢᠶᠠᠨ ᠬᠠᠭᠠᠵᠦ᠂ ᠨᠤᠮ ᠤᠨ ᠰᠠᠩ ᠨᠢ ᠴᠦ ᠡᠨᠡ ᠳᠠᠯ᠎ᠠ   ᠶᠢᠨ  ᠰᠤᠷᠪᠤᠯᠵᠢ  ᠪᠢᠴᠢᠭ   ᠤᠨ ᠪᠦᠳᠦᠭᠡᠨ ᠪᠠᠶᠢᠭᠤᠯᠤᠯᠳᠠ ᠬᠢᠬᠦ ᠪᠠᠨ ᠦᠨᠳᠦᠰᠦᠨ ᠳᠡᠭᠡᠨ ᠵᠤᠭᠰᠤᠵᠦ᠂ ᠤᠳᠤ  ᠬᠡᠳᠦᠭᠡᠨ  ᠪᠠᠭᠰᠢ  ᠮᠤᠩᠭᠤᠯ  ᠬᠡᠯᠡ  ᠳᠡᠦᠭᠡ ᠰᠤᠶᠤᠯ ᠤᠨ ᠳᠤᠬᠠᠢ ᠬᠢᠴᠢᠶᠡᠯ ᠬᠦᠮᠦᠵᠢᠯ ᠢ ᠪᠤᠰᠤᠳ ᠮᠡᠷᠭᠡᠵᠢᠯ ᠤᠨ ᠬᠡᠰᠡᠭ ᠠᠭᠤᠯᠭ᠎ᠠ ᠪᠤᠯᠭᠠᠨ ᠵᠢᠭᠠᠬᠤ ᠪᠤᠯᠵᠠᠢ᠃ ᠢᠩᠬᠢᠭᠡᠳ ᠳᠤᠰ ᠰᠤᠷᠭᠠᠭᠤᠯᠢ ᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠤᠨ ᠦᠢᠯᠡᠰ ᠨᠢ ᠪᠦᠬᠦ ᠠᠩᠭ᠍ᠯᠢ ᠳᠤ ᠳᠡᠷᠢᠬᠦᠯᠡᠵᠦ ᠪᠠᠶᠢᠭᠰᠠᠨ ᠠᠴᠠ ᠪᠠᠨ  ᠤᠳᠤ ᠤᠮᠠᠷᠳᠠᠨ ᠮᠠᠷᠳᠠᠭᠳᠠᠬᠤ ᠳᠤ ᠬᠦᠷᠦᠭᠰᠡᠨ ᠪᠠᠶᠢᠨ᠎ᠠ᠃ 1986 ᠤᠨ ᠳᠤ  ︽ᠮᠤᠩᠭᠤᠯ  ᠪᠤᠯᠤᠨ  ᠳᠤᠳᠤᠭᠠᠳᠤ  ᠠᠽᠢᠶ᠎ᠠ   ᠶᠢᠨ ᠰᠤᠳᠤᠯᠤᠯ ᠤᠨ ᠳᠦᠪ︾ ᠺᠠᠮᠪᠷᠢᠵ ᠶᠡᠭᠡ ᠰᠤᠷᠭᠠᠭᠤᠯᠢ ᠳᠤ ᠪᠠᠶᠢᠭᠤᠯᠤᠭᠳᠠᠭᠰᠠᠨ ᠠᠴᠠ ᠪᠠᠨ ᠺᠠᠮᠪᠷᠢᠵ ᠶᠡᠭᠡ ᠰᠤᠷᠭᠠᠭᠤᠯᠢ   ᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠳᠠᠬᠢᠨ ᠰᠡᠷᠬᠦᠨ ᠬᠦᠭᠵᠢᠵᠦ᠂ ᠤᠳᠤ ᠠᠩᠭ᠍ᠯᠢ ᠶᠢᠨ ᠳᠡᠷᠢᠬᠦᠯᠡᠬᠦ ᠮᠤᠩᠭᠤᠯ ᠰᠤᠳᠤᠯᠤᠯ ᠤᠨ ᠳᠦᠪ  ᠪᠤᠯᠤᠨ ᠬᠦᠭᠵᠢᠭᠰᠡᠨ ᠪᠠᠶᠢᠨ᠎ᠠ᠃              ᠳᠡᠯᠭᠡᠷ ᠤᠨ ᠵᠤᠬᠢᠶᠠᠭᠰᠠᠨ ︽ᠠᠩᠭ᠍ᠯᠢ ᠠᠮᠧᠷᠢᠺᠠ ᠶᠢᠨ ᠮᠤᠩᠭᠤᠯ ᠰᠤᠳᠤᠯᠤᠯ ᠤᠨ ᠳᠤᠶᠢᠮᠤ︾ ︵ᠦᠪᠦᠷ ᠮᠤᠩᠭᠤᠯ   ᠤᠨ ᠠᠷᠠᠳ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ᠂ 2014 ᠤᠨ ᠤ 7 ᠰᠠᠷ᠎ᠠ︶ ᠬᠡᠬᠦ ᠨᠤᠮ ᠠᠴᠠ ᠰᠡᠶᠢᠷᠡᠬᠦᠯᠪᠡ᠃ ᠬᠠᠷᠢᠭᠤᠴᠠᠭᠰᠠᠨ ᠨᠠᠶᠢᠷᠠᠭᠤᠯᠤᠭᠴᠢ᠄ ᠲᠤᠷᠤᠨ᠎ᠠ
  
ᠢᠷᠡᠯᠲᠡ᠄ ᠠᠷᠠᠳ ᠤᠨ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠥᠪᠥᠷ ᠮᠣᠩᠭᠤᠯ ︽ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠲᠠᠪᠤᠨ ᠵᠢᠯ︾ ᠤᠨ ᠬᠤᠭᠤᠴᠠᠭᠠᠨ ᠤ ᠣᠯᠠᠨ ᠨᠡᠶᠢᠲᠡ ᠶᠢᠨ ᠁
ᠪᠤᠶᠠᠠ ᠢ ᠪᠠᠳᠠᠷᠠᠭᠤᠯᠣᠬᠴᠢ ᠰᠦᠮ᠎ᠠ ︵ᠭᠤᠸᠠᠩ ᠹᠥ᠋ ᠰᠧ︶
ᠪᠤᠭᠤᠳᠣ ᠶᠢᠨ ᠰᠢ ᠶᠣᠸᠠᠠ ᠪᠠᠭᠤᠷᠢ
ᠦᠷᠪᠤᠬᠡ ᠬᠠᠶᠢᠴᠢᠯᠠᠬᠤ ᠶᠣᠰᠣᠠ
ᠮᠤᠩᠭᠤᠯᠴᠤᠳ ᠤᠨ ᠭᠤᠷᠪᠠᠯᠠᠬᠰᠠᠠ ᠰᠤᠶᠤᠯ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备18001850号